PR-G 148 Ruta pola Ría de Corme

Distancia	20 km
Dificultade	Baixa
Tempo	5 horas
Tipo de Roteiro	circular
M.I.D.E.	1.2.2.3.
BTT	Apta
Descarga Roteiro	Track da ruta
Geocaching	Mapa do tesouro
FOTOS	FOTOS

En esta ocasión imos a presentar unha sinxela pero moi bonita ruta que misturará ingredientes tan fermosos como increíbles vistas a Ría de Corme ou a desembocadura e esteiro do río Anllóns; costa, dunas, praias e montes.

Tomamos como referencia para o inicio da ruta o xardín de Corme, e facilmente localizable, probablemente o lugar máis idóneo para iniciar a ruta; avanzamos os primeiros metros polo paseo maritimo en onde encontramos un panel da ruta e as primeiras marcas de sendeirismo. Esta ruta está sinalizada pola FGM como PR-G 148 e podemos seguir as marcas sen medo a perdernos, pero nos imos a variala un pouco para facela circular e creo que algo máis agradable. Abandonamos o paseo maritimo para seguir a estrada cara a veciña Corme Aldea encontrando a cusquiña e antiquisima capela de San Xosé.

   Deixando Corme Aldea e pasando xunto a igrexa de San Adrián camiñamos en dirección o pequeno lugar de Froxán, un grupiño de casas escondidas polo monte e terra de músicos como o sinala un monolito a carón do lavadoiro, este río de lavar é bastante máis lindo que o monolito que o preside, non só polo arregladiño que ten o seu entorno, senón pola sua construcción circular aproveitando a auga de un pequeno regato que baixa do monte e que abandona o lavadoiro para continuar o seu curso hacía o mar.

Deixando Froxán adentrámonos no monte entre eucaliptos en suave pero continua ascensión, dise que esta costa ascendente e de cor verde foi a que inspirou a Pondal para escribir o poema Os Pinos do que provén o noso himno. Segundo imos ascendendo a arboleda desaparece dando paso ao monte baixo, que por influencia da costa será basicamente de toxos e xestas no que afloran continuos penedos graniticos e aparecen os primeiros miradores dende o alto a ría de Corme.

Este camiño que tomamos en Froxán acaba morrendo na estrada que baixa a Balares, nós ascenderémola uns metros ata a rotonda que serve de cruce para os repetidores, a ruta baixa por un camiño estreito xunto a cuneta da rotonda pero creemos que non podemos marchar de este punto sin subir ás antenas do Monte Branco do que tanto falou Pondal dende este punto veremos dende o alto a ría, a desembocadura do Anllóns e a totalidade do seu esteiro.

Tomamos a senda descendente que nace na cuneta da rotonda, xunto ao quitamedos da estrada e baixamos de forma continua ata o lugar de Currás, un dos puntos máis baixos de este roteiro, estamos xa no esteiro do río Anllóns, de gran riqueza ornitolóxica, e no que podemos ver no seu espacio intermareal garzas, garavitas, mazaricos e demáis paxariños. Con calor este tramo pode facerse longo debido a que andaremos por area e dunas.



A area vai dar paso ao camiño entre rochas pero non máis feo que o outro tipico sendeiro costeiro no que vemos a desembocadura do Anllóns coa Barra que non é máis que unha frecha de area que divide o río do mar, e como non xa entre o salitre e o batido mar está a illa da Tiñosa.



Este camiño acabaráse na fermosa praia de Balarés, praia dividida en dous por un pequeno puntal de rocha e rodeada por un fermoso piñeiral alpicado de mesas de pedra e ideal para xantar entre piñeiros e figueiras; en un dos lados da praia hai un pequeno porto que se empregaba para exportar o mineral de titanio que se extraía da mina que agora é un restaurante.

Deixamos atrás Balares en dirección a Gondomil facendo a última ascensión, corta pero pronunciada, ao rematar a subida volveremos a encontrarnos con excelentes miradores naturais, en este caso da vila de Corme. O camiño desde este punto será de baixada ata Gondomil.

No lugar de Gondomil achase un curioso cruceiro chamado a Pedra da Serpe, porque na base que sustenta a cruz está esculpida unha serpe alada; os defensores da cultura celta recoñéceno como un dos símbolos máis importantes de esta cultura e santuario para orar a este animal alado e sagrado para eles, a cruz sería posterior e colocada para cristianizar as tradicións locais. A tradición cristiá argumenta que esta zona estaba infestada de serpes e o evanxelizador San Adrian con un golpe de zapatilla abreu o terreo en donde encerrou ás serpes tapando o burato con esta pedra. Sexa como fose é o principal monumento da zona e con unha datación probada non inferior á da época da construcción da igrexa de San Adrián de Corme Aldea.



Deixando atrás a Pedra da Serpe continuamos o camiño ata a praia da Hermida na que veremos a illa da Estrella á que se pode acceder a pé con marea baixa e na que supostamente foi atopada unha virxe gardada e venerada o luns de pascua na igrexa de San Adrián

Non nos quedará máis de un quilómetro para rematar a ruta pasando pola praia do Osmo e recorrendo o paseo marítimo para chegar de novo ao punto de partida.

Non debemos de abandonar Corme sin visitar o cabo Roncudo, lugar onde sempre empezou a Costa da Morte e famoso por producir os mellores percebes do mundo, sobretodo os da chamada Pedra, un baixo que se verá bater a uns 400 metros da costa; eso sí despois de facer a ruta a visita ao cabo roncudo podemos facela en coche.

Espero que vos gustase esta ruta, recordade que hai pouca sombra e en tempo de calor precisase bastante auga. Espero que o pasedes ben, buscade o noso tesouro e non dubidedes en escribir as vosas vivencias da ruta.